Charta qua Segwinus notum facit se vineas et campum in villa Marchisolio monasterio Cluniacensi dedisse.
Noverint cuncti fideles sanctę Dei ęcclesię, quod ego Segwinus, pro redemptione animę meę, necnon et uxoris meę Falectrudis nomine, et patris mei et matris meę et omnium parentum meorum, tam vivorum quam etiam defunctorum, dono aliquid de hereditate mea Deo et sanctis ejus apostolis Petro et Paulo, ad locum Cluniacum, in quo preesse videtur famulus Dei domnus Odilo abba: hos est unam vineam in villa Marchisolio, et campum juxtapositum; terminatur autem ipsa terra ex una parte hereditate Sancti Johannis, ex alia parte hereditate Sancti Petri, Cluniacensis cęnobii, et seniorum inibi Deo militantium. Dono etiam supradictis monachis, post meum discessum, vineam quę evenit mihi ex parte Walterii, avunculi mei, ut habeant, teneant et possideant, tam in vita quam etiam post mortem meam. Est autem ipsa vinea in supradicta villa Marchisolio. Dono etiam ipsis monachis, post mortem meam, unam vineam quę evenit mihi ex parte patris mei, et pratum juxtapositum, et campum, tali conventu, ut, ubicunque ego finiero, ipsi Cluniacum corpus meum conducant et sepeliant. Ego Segwinus manu propria firmo. S. Maingodi.